Tag Archives: القطر، محطة_مصر، مصر، القاهرة، رمسيس، محطة، مهزلة، تجربة

القطر

جوزي راح اسكندرية اسبوع تبع البنك وفكرت اروح اقضي معاه يوم وارجع في نفس اليوم علشان الولاد هسيبهم. المهم ظبطت لمريم انها تبات عند صاحبتها ليلة الخميس علي اساس اني اسافر الجمعة الصبح وارجع بليل ان شاء الله. وفعلا حجزت مع كريم انهم يعدوا عليا الصبح الساعة 7 علشان الحق قطر اسكندرية بتاع الساعة 8وربع المكيف. اصل انا كنت سامعة ان محطة مصر اتجددت وبقة فيها مول وحركات وقلت يلا اهي دي مغامرة في حد ذاتها اني اركب القطر وخصوصا ان بقال سنين ماركبتوش يمكن من 25 سنة عالاقل احم احم يعني مش عايزة اكبر نفسي ولكن دي الحقيقة. صحيت الجمعة الصبح وجهزت وجالي كريم ورحت المحطة 7ونص والحمد الله كان لسة في وقت اني احجز وسألت عن مكان حجز التذاكر لغاية لما وصلت الشباك ووقفت ورا ست واستنيت دوري بعدها لكن لقيت واحد سبق انه يدفع مع انه جاي بعدي، طبعا ماعجبنيش الوضع وقلت له في طابور علي فكرة وانا جاية قبلك لكن للاسف الموظفة خدت منه الفلوس وبدون ماحد فيهم يعتذر وانا اتنرفزت وقلت مافيش نظام ابدا وبرضه لا حياة لمن تنادي. المهم جيت ادفع وطلعت 100 جنيه قالت لي مافيش فكة لازم تطلعي 50 وكوين جنيه قلت لها مش معايا ولا الخمسين ولا الكوين قامت قالت لي اتصرفي. مش فاهمة اتصرف ازاي يعني. قالت لي بمنتهى السطحية روحي فكي طبعا طلعت من شعوري ساعتها وانا اصلا مش طايقاها من موقف الدور اللي عدتهولي دة وكمان عايزاني امشي من الطابور واروح افك علشان ارجع اقف في الطابور من تاني. ابتديت اعلي صوتي وقلت مش مسؤوليتي اني اوفر فكة وان هما مجبرين يفكولي طبعا جا واحد زميلها ووقف معاها ضدي وقال ولا هي عليها تسيب مكتبها علشان تفك لكم. المهم وقفت في مكاني واتسمرت لاني ماكنتش عايزة دوري يروح عليا وانا واقفة ناس عرضت عليا جنيه لاني صعبت عليهم بس انا مارضيتش اولا لاني ماعرفهمش ولا هاقدر ارجع لهم فلوسهم ثانيا لان كبرت في دماغي وقفلت من الناس اللي عالشباك. المهم بعد لحظات من المهاترات والكلام الكثير افتكرت ان عندي في المحفظة جنيه ورق قديم رحت مطلعاه والراجل بكل غلاسة بدل ما ياخده ويسكت ويمشي الموضوع لا قالي ماهو الجنيه موجود اهو بس انتي اللي غاوية مشاكل قلت استفزه وقلت له اه كان موجود بس استخسرته فيك واخدت تذكرتي بعد ما كنت فغلا مفكرة اني اخد بعضي وامشي وبلاها سفر من اساسه. خلصت من التذكرة واتجهت للرصيف طبعت اتلخبطت لان مش مكتوب عالتذكرة رقم الرصيف بس سالت علي قطر اسكندرية شاورولي علي رصيف 5 ورحت طلع انه قطر مش مكيف قبل  اللي انا حجزاه. سالت عن القطر المكيف رقم 901 وواحد قالي دة علي رصيف 2 ووصلت له الحمد الله قبل طلوعه بربع ساعة ودخلت بس طبعا ولا فيه كمسري اساله عن العربية ولا رقمها ولا مكاني فين ولا اي حاجة. دخلت عالبركة وقعدت وولا في حد بيسال ان كنت قاعدة في مكاني اصلا. كل واحد بيخش يقعد زي ماهو عايز والاغرب ان اللي دافع درجة اولى زي اللي دافع درجة تانية عادي جدا. الاغرب بقة اني شفت ناس داخلة من غير تذكرة اصلا ومالقيوش مكان وفضلوا واقفين علي رجليهم لغاية لما بدا يتحرك القطر وظهر الكمسري يبص عالتذاكر. اخيرا لقيت الشخص اللي كان مفروض اشوفه عالقطر. شاف تذكرتي وتذاكر الناس اللي قاعدين كلهم وبعدين راح للناس اللي واقفة وخد منهم فلوس اكثر من تمن التذكرة اللي احنا دافعينها. مش مصدقة انهم يدفعوا اكثر مننا احنا اللي قاعدين وهما يفضلوا واقفين ساعتين ونص علي رجليهم.  ايه دة يا بلد. ايه النظام دة ولا ايه الفوضى دي. حاجة غريبة جدا. شوية ولقيت واحدة من اللي واقفين قعدت عالارض وراح قاعد جنبها اللي معاها. طب في الحالة دي ايه المفروض اللي يحصل؟ هل شاب كدة صغنن مفروض يقوم من مكانه ويعرض عليها تقعد ولا كله يكبر دماغه. طبعا كله كبر. هو فعلا غلطتها انها جاية مش حاجزة بس مافيش اخلاق زمان ولا انسانية زمان. واديني لسة في القطر باشوف حاجات غريبة عليا والله اعلم هاشوف ايه تاني.

Advertisements

Leave a comment

Filed under Blogs